Thursday, December 31, 2009

O le Mau a Samoa 2009

O Samoa o le I'a iviiviia ma oute faatulou atu ile pa'ia ma le mamalu ole atunuu ua faitauina lenei Blog ona oute manatu ole a afaina ai se lagona o nisi ole a faitauina lenei mataupu tusia aua o mataupu e faatatau i le lumana'i a Samoa ae maise le tula'i mai o faiga malo e ono lepetia ai faavae ole Malo e pei ona sa fausia ma faataatiaina e o tatou auga tama ua fai i lagi a latou folauga.  Ua ou tusitusiina lenei Blog ina ia mafai ai e le mamalu lautele a Samoa o loo papa a'ao i itu e fa ole lalolagi ona faitau i le tatou lava gagana i mataupu ua tula'i mai ona o faiga malo oloo ua tulai mai ma se tulafono ua iai se popolega i nisi o i matou, o le a talepeina ai le puleaga a aiga, nuu ma itumalo ma faatapulaaina ai aia tatau a tagata Samoa i o latou lava fanua ma ave'eseina ai le soifuaga filemu a Samoa e pei on sa sau a'i le tatou atunuu.
Samoa e, le tatou pale ina ne'i toe avea.  I le oo mai o faiga malo mai fafo ma suiga mata'utia na faamalosia e ia malo a iai Siamani ma Niu Sila, sa iai e na tete'e i le pule 'esea o le soifuaga a tagata nuu a Samoa.  Sa tula'i mai ai le Mau a Pule i le tausaga 1909 sa faafoeina e le tulafale faitauina mai Salafai o Lauaki Mamoe.   Sa ia tu malosi ina ia pulea lava e tagata Samoa, le latou lava atunuu e pei ona sa sau a'i Samoa mai anamua.  Sa iai latou o e sa faitio i le Mau a Pule, ona sa latou manatu o Siamani ua sili le atamai ma le maumea e mafai ona maua ai se manuia a Samoa pe a latou usita'i ma mulimuli i pulega a Palagi. A o Lauaki lava ia na le talitonu o Malo a Papalagi ua mamao le tofa ma le utaga i faiga malo e manuia ma saogalemu ai si o tatou atunuu. Sa silafia e Lauaki o atunuu mai fafo e le alolofa ia Samoa, e pau lava le mea o loo sailia e nei malo o le pulea o mea totino ma tagata a Samoa ina ia maumea ai latou lava ae le o iai se manatu alofa mo le lumana'i manuia o tagata Samoa.
Ina ua iloa e Lauaki e le o se tulaga lelei lenei mo Samoa sa ia tula'i malosi mo le tu to'atasi o Samoa ma sa avea le Mau a Pule ma faasoesa i le Pulega a Siamani se'i oo ina faatafea ai Lauaki ma alii ma faipule na lagolagoina le Mau a Pule.  O lea faatafeaga na ave faamalosi ai Lauaki i Saipani sa i'u ai lava na maliu le tulafale i Tarawa i le toe fo'i mai i Samoa i le mae'a ole taua muamua o le Lalolagi.
Ile mae'a o le puleaga a Siamani i Samoa na tuuina atu e Peretania Samoa i lalo ole puleaga a Niu Sila. Sa oo na fiu Samoa i pulega saua a Niu Sila ma sa tula'i mai ai le Mau a Samoa sa faafoeina e Tupua Tamasese Lealofi III ile tausaga 1929. O lea faatuiese i le pulega a Niu Sila sa oo ai lava na faaumatia ai le soifua a le Afioga a le Tama Aiga ina ua fanaina e fitafita a Niu Sila i Apia a o faia se latou solo tete'e filemu.  O le Mau lenei sa faia i ala filemu ma le faatuiese ina ia silafia ai e tagata o le lalolagi e le to'ilalo tagata Samoa i fana ma faiga saua a malo mai fafo. Ole faatui'ese lenei na silafia ai e isi malo le mata'utia o faiga saua a Niu Sila ma le to'a o le pulega a Matai a Samoa ina ua latou le taui ma sui ae sa iai pea le onosa'i ma le amio faatamalii i o tatou tagata.  O ia foliga sa suia ai manatu a e ua pulea Niu Sila ma atunuu mamao ma sa latou talitonu ai o Samoa o se atunuu ua lava le faapalepale ma le tofa mamao e pulea ai lava e i latou le latou lava atunuu.  Ole i'uga o lenei taumafaiga sa amataina e Lauaki ma faaauau e Tupua Tamasese, ua tula'i ma ai le Malo Tuto'atasi a Samoa i le 1962.
O le lua ai lea o Mau ua faia mo le sa'olotoga a le atunuu o Samoa mai pulega a atunuu mai fafo. I taimi uma e lua na faataunuuina ai lenei mau na maliliu ai toa a Samoa, o tamali'i ma failauga faitauina a le atunuu.  Ua masa'a le toto a Samoa ona o le sa'iliga ole sa'olotoga mai pulega mai fafo.
Ae paga lea, o le tausaga 2008 ua toe manu a'e ai le faama'i lava lenei e tasi o pulega malosi a atunuu mai fafo ia Samoa.  O le vaitaimi la lenei ua tu le Malo a Samoa, ae ua ui mai le pule'esea a Samoa i se auala faatogafiti ua pei se a i oloo pulea e Samoa le latou lava Malo ae leai, o tonu a malo mai fafo ua fai a'i ai le tatou malo ma afai e le faatapulaaina pulega a Malo mai fafo, ole a tu mai na'o se atigi malo, ae pulea mai e malo ma kamupani mai fafo si o tatou atunuu.
Ole tulafono lenei ua ta'ua o le Lands Title Registration Act 2008, ("LTR 08") ose tulafono ua fauina ma pasia e le Malo a Samoa e aunoa ma se pogai tatau poo se mea ua faaletonu ua tatau ona faaleleia e lenei tulafono.  E leai se mea ua mana'omia ai lenei tulafono ina ia suia le auala e resitalaina ai fanua a Samoa.  O se mea e sili ona taua oloo ufitia e lenei Malo o Samoa, ole tulafono lenei ole a resitalaina ai ma fanua tau Samoa.  Ose tulaga lenei sa le mana'omia i aso ua mavae a o lenei ua tula'i mai lenei Malo ua te'i lava ua mana'omia le resitalaina o fanua tau Samoa.  Aisea?  E leai ni faitioga mai aiga ma nuu i le tulaga o fanua tau Samoa.  Sa leai ni tala mai Samoa e faapea ua tele le femisaa'i o aiga i aia o tagata nuu i fanua tau Samoa.  O lona uiga o se tulafono na fauina mo le tamaoaiga o ai?
O le tulafono lenei o se tulafono o le a faamalosia ai le resitalaina o fanua tau Samoa.  O le tulaga e faapopoleina ai e o loo maitauina lenei tulafono ona o le puleaga o fanua e aofia ai ma fanua tau Samoa o le a pulea e e o le a iai a latou suafa i luga o le pepa resitala.  O lona uiga, o se tasi e le o iai lona igoa i luga o lenei pepa resitala ua faamutaina sona aia i le fanua.  Ole a suia ai le tulaga o Samoa ma le aia o tagata uma i fanua tau Samoa e pei ona sau ai si o tatou atunuu i tausaga ua mavae.
I tausaga ua mavae sa le mana'omia le iai o se fasi pepa resitala ina ia faamaonia ai lau aia i fanua a lau lava aiga.  O tagata uma lava e tupuga mai i lenei aiga e iai le aia tatau i fanua a le aiga.  I le tula'i mai o lenei tulafono o le a faatapulaaina le aofa'i o igoa e mafai ona tuuina i lenei pepa ma afai e faamalosia lenei tulafono o lona uiga na'o e ole a iai a latou suafa i luga o lenei fasi pepa o le mafai ona faamalosia a latou aia tatau i fanua a le aiga laua'itele.  O le to'atele e ole a leiloa a latou aia i fanua ma o se tulaga o le tulai mai ai le femisaa'i ma faatupuina ai faalavelave i nuu ma afioaga.  Ua ave'eseina le puleaga a tagata Samoa mai o latou lava fanua ma ole a tuuina atu ile malo e faia faaiuga mo le puleaina o a tatou fanua.
O se tulaga lenei sa faatuiese ai Lauaki ma Tupua Tamasese ina ia aua ne'i tuuina atu le pulega a a tatou lava fanua totino ise Malo poo se puleaga e ese mai o tatou lava aiga.  A o lenei ua tulai mai le auala o le mafai ai e le Malo ma pulega mai fafo ona lepetia le faavae o le sa'olotoga a si o tatou atunuu e pei ona iai talu mai le 1962 ona ua iai le auala e faatapulaa ai aia a tagata nuu a Samoa. Afai ole a faamalosia lenei tulafono o lona uiga na'o le o loo iai lona igoa i le pepa resitala o le a pulea fanua.
Oloo iai se faitioga i nisi ua latou talanoaina lenei tulafono ona e faapea o le Sa'o o le aiga o ia lea o le a tuuina lona igoa i lenei pepa.  Afai e faapenei le tulaga o le faaresitalaina ai fanua tau Samoa o lona uiga i le va'aiga faalemalo male tulafono na'o le Sa'o lava ole aiga ma lana fanau o le mafai ona pulea nei fanua.  O le ave'eseina aia a tagata uma o le aiga se'i vagana o le Sa'o.  Aisea ua mana'omia e le malo lenei suiga?  Aisea ua finagalo ai le Palemia ina ia suia le pulega a fanua tau Samoa ina ia aveeseina mai aia a tagata uma a le aiga ae tuuina atu ise tagata e to'atasi?
Ole tali o ia fesili ona o loo pulea mai e isi malo mia fafo faapea ma Fale Tupe tetele a le lalolagi faaiuga fai a lenei Malo.  Ua le o toe tuto'atasi Samoa.  Afai tatou te le suia lenei tulafono ma ave'eseina lenei pulega faamalosi mai malo ma kamupani mai fafo, o lona uiga o le a pei tatou o tagata Hawaii ma Maori ma Apoliki i Ausitalia, ua leai ni fanua ma ua pulea e tagata mai fafo a latou fanua ae o nonofo i le matafaga ma fanua le mana'omia e nei tagata nuu ese.  E pei ona sa iloa e Lauaki, o nei tagata e le alolofa ia Samoa.  E ala ona o mai ma faamasani ia malo e iai Niu Sila ma Ausitalia ia Samoa ona e iai mea totino a tatou o loo manana'o iai.  Ua tele tupe nono ua aitalafu ai si o tatou malo i ia atunuu ma fale tupe tetele.
Afai e le mafai ona totogi e Samoa nei aitalafu o lea le mea o le a tupu?  Ioe, ole a mafai e nei malo ona ave'eseina a tatou fanua aua e le lava mea fausia pe toto i Samoa ina ia mafai ai ona totogi nei aitalafu.  Atonu o le pogai lea ua fai ai e le Malo a Samoa lenei tulafono ole LTR 08 ina ia mafai ai ona mumulu a tatou aia i fanua tau Samoa ma avatu i ia kamupani ma atunuu ese e totogi ai a tatou aitalafu.
Ose tasi o tulaga e le o iloa e le tele o tagata e le na'o Samoa o loo una'ia e nei malo ina ia suia a latou tulafono tau fanua faaleaganuu.  O le tulaga o loo faafeagai nei ma Fiti, Papua Niu Kini ma isi malo o le Pasefika ua tutusa lava ma i tatou ma o le pogai lea o loo tula'i malosi ai le puleaga a le Malo a Fiti ina ia aua ne'i suia le latou faavae aua e tutusa lava aia a tagata Fiti i o latou fanua e pei o le tulaga o loo iai fanua Samoa.  O le tulaga lenei o loo una'ia  i le vasa Pasefika i malo uma nei na tuto'atasi ina ua mua'i Tuto'atasi Samoa.  Afai tatou te le faatui'ese i lenei tulafono ole a faapea ona toe ave'eseina le tatou pale aua o loo iai se fuafuaga a Malo mai fafo ina ia latou pulea a tatou tagata e ui mai lea i le pulea o  tatou fanua.  Aua ne'i tatou faatagaina lenei tulaga e pei ona sa mua i malae Samoa i faiga Malo Tuto'atasi i le Pasefika, ia faapea fo'i na muamua Samoa i le tete'e atu i nei auala faatogafiti ua alia'i mai i lenei vaitaimi.
Samoa Tula'i!